حسني عبدربه: لست مسؤولاً عن ملف الصفقات و هذا سبب عدم اكتمال صفقة الوحش و الشامي للمصري

قال حسني عبدربه مدير الكرة السابق بالنادي الاسماعيلي أنه لم يقم بالتعاقد مع أي لاعب خلال الانتقالات الصيفية الماضية، مشيرًا إلى أن هذا الأمر لم يكن أبدًا من اختصاصاته.

و أضاف عبدربه في تصريحاته لبرنامج “جمهور التالتة” : أحمد الشيخ و احمد علوي هم المسؤولين عن صفقات الفريق هذا الموسم ، أقسم بالله ما حد خد رأيي في صفقة واحدة ولا جبت صفقة واحدة و مفيش حد في النادي يقدر يكذبني.

و تابع: ” يحيى الكومي طلب من وكيل جاريدو يبلغني بالإقالة أثناء عودتنا من الإسكندرية بعد لقاء الاهلي، استمريت لمدة ٥ ساعات تقريبًا منذ خروجنا من الإسكندرية حتى الوصول للإسماعيلية مش مصدق ومش متخيل بعد كل اللي عملته مع الفريق بقالي شهور ، رجعت بيتي مصدوم كان هيجرالي حاجة”.

و واصل حديثه: “تتفق أو تختلف معه فنيًا لكن عمر الوحش مش واخد حقه تمامًا، لاعب مخلص بمعنى الكلمة للإسماعيلي سواء هو أو باهر المحمدي وبيدفعوا فلوس من جيبهم في حاجات كتير علشان شكل و سمعة النادي .

و أردف: “عرض المصري لضم عبد الرحمن مجدي تخطى ٢ مليون دولار في بداية الموسم ، حسيت بالأزمة المالية اللي داخلة على النادي و طلبت من الادارة الموافقة على العرض لكن لا حياة لمن تنادي”.

و أكمل حسني عبدربه حديثه الناري: ” صفقة عمر الوحش و الشامي للمصري باظت بسبب سمسمرة ٢ مليون جنيه ، انا بتحدى الكومي يطلع ويقول هو فوض مين لإنهاء الصفقة دي .. وفي الآخر يقولوا حسني عاوز يعمل مصلحة من ورا الإسماعيلي، انا ليا فلوس في الاسماعيلي من السنة اللي فاتت و عمري ما اطلبها في الظروف الحالية لو على رقبتي”.

وتابع: “رحيل مجلس الإدارة هو أول الحلول و أولى خطوات النجاح ، أثق في الدكتور أشرف صبحي بشأن تعيين لجنة قوية لإدارة النادي و إنقاذ الأوضاع في النادي”.

و عن أزمة ملابس الفريق الأول قال: “اللاعيبة مضت انها مش عاوزة تلبس شركة الملابس المجهولة بسبب سوء الخامة ، أزمة الملابس لا تخصني من قريب أو من بعيد و لم ابدي اي اعتراض و كل اللي كان يهمني ان النادي الاسماعيلي يظهر بشكل كويس”.

و أضاف القيصر: ” باسم مرسي طلب ٦ مليون جنيه في الموسم، دخلت عليه المكتب أثناء التوقيع في حضور يحيى الكومي و قولتله هما ٣ مليون اللي هتاخدهم يا باسم ، باسم ملحقش يرد عليا لقيت الكومي بيقولي خلاص يا بيه هياخد ٥ مليون ومضى العقود و بعدها قالي ملكش دعوة بمستحقات اللاعبين”.

و أشار: ” رفضت عودة محمد صبحي للإسماعيلي ؟ و الله ما حصل ، صبحي أسطورة و كان نفسي يكون موجود تكريمًا ليه في ختام مسيرته بعد كل اللي قدمه للنادي”.

و عن أحمد حسام ميدو المدير الفني للنادي الاسماعيلي قال: “مهمة ميدو انتحارية، اتمنى له كل التوفيق لكن انا غير متفق معه في عمله الإعلامي في نفس توقيت تدريبه للإسماعيلي ، اتمنى يكون تركيزه بنسبة ١٠٠% مع الفريق”.

و أتم حديثه قائلاً: “المجلس المستقيل فسخ كل العقود اللي عملها مع شركة الملابس المجهولة و الاكاديميات اللي تمت في بداية الموسم”.