محمد فوزي: تحاملت على نفسي من أجل الاسماعيلي .. فرحة المكسب ”نستني“ الإصابة

عبر محمد فوزي حارس مرمى النادي الاسماعيلي عن سعادته الكبيرة بالفوز الذي حققه الفريق على حساب نادي الزمالك أمس السبت بهدفين مقابل هدف في إطار منافسات الجولة 27 من الدوري المصري الممتاز.

وقال فوزي في تصريحات إعلامية: الحمدلله علي كل شئ وبحمد ربنا علي المكسب وعلي مجهود زمايلي كانوا رجالة وببارك لزميلي احمد عادل نجم كبير علي هدوئه وثباته.

وأضاف: اهم حاجه الحمدلله أن اطمنت علي الفريق وعلي زمايلي ماشاء الله رجالة وان شاء الله نكمل علي المستوي ده علي طول.

وأشار: احنا اهم حاجه عندنا نعدي بأي حد مش شرط فوزي يلعب اي حد يلعب اهم حاجه نعدي، انا فرحة المكسب نسيتني الإصابة.

وأوضح: الحمدلله الإصابة اللي عندي دي كانت موجودة من قبل المباراة كان عندي قطع في الغضروف بس مكانش في مانع اني ألعب عليه.

وتابع: الدكتور مجدي الباز قال لي كان لازم تعمل عملية علشان تخلص منها وبصراحة أنا مسمعتش كلامه وقولت اكمل عليها تأهيل والحمدلله جابت نتيجه وكانت تمام لكن في الهدف مهاجم الزمالك بيقلش الكورة الثابته لفت وحسيت بطرقعه في الركبة ومقدرتش اكمل.

واستكمل: الحمدلله خير بحمد ربنا، اي حد يلعب المهم نطلع من اللي احنا فيه وربنا يكرم زمايلي الفترة القادمة والاسماعيلي.

وأتم حارس عرين الدراويش حديثه: النادي حجز لي عند الدكتور اليوم هنعمل منظار ونطمن نشوف الاخبار ايه.

وفاز الإسماعيلي على الزمالك بهدفين مقابل هدف في المباراة التي جمعتهما مساء امس بإستاد الإسماعيلية بهدفي ياو أنور ومحمد أشرف روقا بالخطأ في مرماه بينما سجل إبراهيما نداي هدف الزمالك.